ሚኒስቴር ማሕበራዊ ጉዳይን ደቂ ኣነስትዮን ፌደራል ንትግራይ ሓሙሽተ ሚሊዮን ብር ሓገዝ ሂቡ ።

ብሚኒስትራት ፌደራል ዝተመረሐ ጉጅለ ልኡኽ ዝተፈላለዩ ሓገዛት ሒዙ ሎሚ መቐለ ዝአተወ እንትኾን ምስ ዝምልከቶም ኣካላት እውን ተራኺቡ ኣሎ ።

ህዝቢ ትግራይ አብ ከቢድ ሓደጋ ድርቂ ወዲቑ ይርከብ ዝበላ ሓላፊት ቢሮ ፋይናንስ ትግራይ ዶክተር ምሕረት በየነ መሃያ ዘይተከፈለ ሰራሕተኛ ሰለ ዘለና ነዚ ንምፍታሕን ህዝቢ ትግራይ ንምድሓንን ህፁፅ ሓገዝ የድሊ ክብላ ነቶም ልኡኻት ገሊፀናሎም።

ኮሚሽነር ኮሚሽን ጉምሩክ ኣይተ ደበሌ ቃበታ ብወገኖም ህዝቢ ትግራይ ንምሕጋዝ ዝተፈላለዩ ኣልባሳትን ምግቢ ተንከፍን ሓገዝ ሒዝና መፂእና ኣለና ድሕሪ ምባል ነቲ ኣብ ትግራይ ኣጋጢሙ ዘሎ ሓደጋ ንምምካት ተሓጋጊዝና ክንሰርሕ ይግባእ ኢሎም።

ሚኒስቴር እቶት ወ/ሮ ኣይናለም ንጉሴ ብግድኤን ህዝቢ ትግራይ ዘላቂ ፍታሕ ክረክብ ዝክእል ናብ ንቡር ስርሑን ልምዓትን እንትምለስ እዩ ድሕሪ ምባል ኩሉ ኣካል ሓጋዛይ ክከውን ኣለዎ ኢለን።

ኩናት አዝዩ ከቢድ እዩ ፡ ሰለዚ ህዝቢ ትግራይ ዘላቂ ፍታሕ ንክረክብ ሓቢርናን ተዋዲድናን ክንሰርሕ ኣለና ዝበላ ድማ ሚኒስትር ደቂ አነስትዮን ማሕበራዊ ጉዳይ ዶክተር አርጎጌ እንትኮና ንግዚኡ ሓሙሽተ ሚሊዮን ብር ሓገዝ ኣረኪበን አለዋ ።

እቶም ልኡኻት ጉጅለ ፌደራል ኣብ መዕቆቢ ተመዛበልቲ ዑደት ከሳልጡ እዮም ክብል መሳርሕትና ወልደምህረት ገዛኢ ፀብፂቡ ።